Иран: Танкер за течен гас погоден при минувањето низ Ормускиот Теснец по нелегална рута

Иранската Исламска револуционерна гарда денес соопшти дека танкер за течен нафтен гас бил погоден и се запалил при обид да го помине Ормускиот Теснец преку „нелегална рута“, пренесува Анадолу.

„Огромен брод за превоз на течен гас, под името ‘НВ Саншајн’ и во сопственост на компанијата ‘Натвит’, кој се обидуваше да помине преку нелегална рута јужно од Ормускиот Tеснец, беше погоден и претрпе голем пожар во машинското одделение и погонскиот систем“, се наведува во соопштението на гардата, пренесено од полудржавната новинска агенција „Тесним“.

Во соопштението за ескалацијата на тензиите во регионалниот поморски сообраќај е обвинета „агресорската американска армија“.

Револуционерната гарда исто така изјави дека нејзините поморски сили нема да дозволат „окупаторските сили“ да останат во областа и дека ќе се спротивстават на „какви било непријателски обиди за попречување на нивното управување“.

Пријавениот инцидент се случи во услови на зголемени тензии во Ормускиот Теснец, каде што Иран ги предупреди пловилата да не користат рути што не се одобрени од Техеран.