Белгиски ученици протестираат пред неколку училишта во Лиеж

Протестите на учениците што последнитве денови се одржуваат низ Франција денес се проширија и во Белгија, при што тие спонтано се собраа пред неколку училишта во регионот на Лиеж, јавува Анадолу.

Демонстрациите го нарушија почетокот на наставата во неколку училишта, објави радиодифузерот РТБФ.

Во текот на денот на неколку локации беа пријавени тензии, при што полицијата соопшти дека пред некои училишта фрлале петарди, јајца, јаболка и бариери за контрола на толпата.

Пред Институтот „Мари-Терез“ во населбата Ор-Шато бил запален пожар, а наводно во пламените јазици фрлале скутери и бариери за контрола на толпата.

На колеџот „Сен-Бартелеми“ со железна прачка била скршена и стаклена врата.

Околу овие училишта бил распореден голем број полицајци.

Според наводите, протестите спонтано ги иницирале учениците, а не биле организирани од наставниците или синдикатите.

Учениците наводно побарале помал број ученици во паралелките и соодветен број вработени, поголемо земање предвид на ставовите на учениците и родителите, еднаков пристап до образованието, како и донесување одлуки за кои велат дека треба „да ја градат иднината, а не да ја уништуваат“.

Протестите во Белгија избија во време кога француските средношколци веќе неколку дена го блокираат пристапот до училиштата и протестираат пред нив, барајќи подобри услови за образование.