Службениот весник на Шпанија објави декрет за предвремени општи избори на 29 ноември

Службениот весник на Шпанија денес објави кралски декрет со кој се распушта Парламентот и официјално се распишуваат предвремени општи избори за 29 ноември, јавува Анадолу.

Декретот, што го потпиша кралот Фелипе VI на предлог на премиерот Педро Санчез по седницата на Владата вчера, ги распушта Конгресот на пратениците и Сенатот избрани во јули 2023 година и распишува избори за двата дома.

Гласањето ќе се одржи речиси осум месеци порано од првично предвидениот термин, со што започнува 54-дневен изборен процес согласно со шпанскиот изборен закон.

Официјалната изборна кампања ќе трае 15 дена, од полноќ на 13 ноември до полноќ на 27 ноември, два дена пред изборите, се наведува во Службениот весник.

Избирачите ќе избираат 350 пратеници во Конгресот на пратениците од 52 изборни единици, кои ги опфаќаат 50-те шпански провинции и автономните градови Сеута и Мелиља.

Мадрид ќе избира најголема делегација со 38 пратеници, а по него следуваат Барселона со 32 и Валенсија со 16.

Вкупно 209 сенатори, исто така, ќе бидат директно избрани. Секоја провинциска изборна единица ќе избира по четворица сенатори, додека Гран Канарија, Мајорка и Тенерифе ќе избираат по тројца.

Ибица, Форментера, Менорка, Фуертевентура, Ла Гомера, Ел Хиеро, Лансароте и Ла Палма ќе избираат по еден сенатор, додека Сеута и Мелиља ќе избираат по двајца.

Новите состави на двата дома се предвидува да ги одржат конститутивните седници на 23 декември.