Дрон падна во Романија откако четири минути го нарушувал воздушниот простор

Мал дрон падна во Североисточна Романија денес откако околу четири минути се наоѓал во воздушниот простор на земјата, соопшти романското Министерство за одбрана, јавува Анадолу.

Дронот паднал во близина на Солка, во округот Сучава, без да предизвика жртви или материјална штета, соопшти Министерството во дополнително известување.

Тимови на Министерството за внатрешни работи го обезбедиле подрачјето и го пронашле дронот, при што не бил пријавен пожар на местото каде што паднал.

Претходно романскиот радар детектирал воздушна цел над Украина во близина на границата, северно од округот Ботошани.

Два романски борбени авиона Ф-16 полетале од воздухопловната база Борча за да ја следат ситуацијата.

Властите издале предупредување за јавноста во окрузите Ботошани и Сучава во 6:26 часот по локално време.

Од воздухопловната база Бакау бил пратен и хеликоптер ИАР-330 СОКАТ во 7:21 часот по локално време за да го следи подрачјето, соопшти Министерството.

Во друг случај во текот на ноќта радарот детектирал група воздушни цели над Украина во близина на Килија Веке, во близина на југоисточната граница на Романија.

Два шпански авиона Ф-18, распоредени во рамките на мисијата на НАТО за воздушно патролирање, полетале од воздухопловната база Михаил Когалничеану за да ја следат ситуацијата. Јавното предупредување за северниот дел на округот Тулча завршило во 5:44 часот.

Министерството не го идентификуваше дронот што паднал во близина на Солка ниту соопшти од каде бил лансиран.